منتديات قصر الحب


 
الرئيسيةالبوابةمكتبة الصورس .و .جبحـثالتسجيلدخول

شاطر | 
 

 بلاوي جمعاوي!!!

اذهب الى الأسفل 
كاتب الموضوعرسالة
ابن الاسلام
مشرف القسم الاسلامي
مشرف القسم الاسلامي
avatar

ذكر
عدد الرسائل : 2380
العمر : 33
عارضة الطاقة :
50 / 10050 / 100

تاريخ التسجيل : 30/12/2008

مُساهمةموضوع: بلاوي جمعاوي!!!   الأربعاء أبريل 29, 2009 9:53 pm

-
آلو .. أيوة يا جمعاوي ؟
- انت فين يابني ؟ سايبني ملطوع كدة في الشمس ؟ دانا قربت أسيح
- معلش .. حصل لي مشكلة .. ربع ساعة وحكون عندك
- بسرعة يا عبده .. يا إما تبقى تجيب معاك كوباية تعبيني فيها


كنا متفقين أنا وعبده نتقابل عشان أروح معاه وهو بيعمل اختبار رخصة السواقة .. وعلى فكرة عبده دة يبقى من أعز أصحابي .. وأنا شايف إن هو وأمثاله لازم يتحطوا في متحف .. أو يعملولهم محمية طبيعية قبل ما ينقرضوا .. ودة لأن فيه صفة بقت نادرة جدا في زمانّا دة
والصفة دي إن هو ( طيب )
آه والله .. تصدقوا إن في عصرنا دة لسة فيه حد زي ما بيقولوا : "على نياته"
بعد ما بقت كلمة طيب عند كتير من الناس معناها غبي أو حتى -آسف في اللفظ- أهبل أو عبيط .. وبقت الطيبة قناع يلبسه الناس عشان يخدعوا بعض ..
وانتشرت مقولة : "اعمل عبده" .. يعني اعمل نفسك عبيط ومش واخد بالك
أهو عبده دة يبقى هو صاحبي اللي بكلمكم عنه

وعشان تصدقوني ححكيلكم موقف من مواقف عبده الطيب .. يعني مثلا كان مرة بيناقشني وبيحاول يقنعني إن الذكاء وراثة :
- طب ليه يا عبده بتقول كدة ؟
- أصل أنا بذاكر مهما أذاكر .. وبرضه مفيش فايدة .. لكن أولاد الدكاترة اللي هما أصلا أولاد دكاترة ما شاء الله عليهم .. بأقل مجهود ألاقيهم من الأوائل .. عرفت بأة إن الذكاء وراثة ؟
- يا حبيبي مش الذكاء هو اللي وراثة .. دي حاجات تانية هي اللي وراثة
- قصدك إيه يعني ؟
- أصل انت طيب أوي يا عبده .. ناقص تقول لي إن الذكاء الوراثي هو سبب تولي بوش الابن رئاسة أمريكا . وبشار الأسد رئاسة سوريا .. وإنه حيكون سبب تولي ..... انت شكلك حتودينا في داهية

مش بقول لكم طيب .. أسيبكم بأة عشان عبده وصل

- إيه يا عبده اتأخرت ليه كدة ؟
- معلش يا جمعاوي .. أصل أنا كنت في رعاية الشباب بقدم ورقي
- ورق إيه يا عبده ؟
- أصلي كنت ناوي أرشح نفسي لانتخابات اتحاد الطلاب .. لكنهم خلوني أكتشف النهاردة إن أنا مش كفء للموضوع دة
- انتخابات إيه بس !! هو انت ملكش أي قريب أو صديق أو معرفة بحد من الحزب الحاكم ؟
- لأ خالص .. بس إيه علاقة دة بالموضوع ؟
- أمال كنت رايح تقدم إزاي بس ؟! انت شكلك طيب ع الآخر .. طبعا لازم ما يرضوش بيك
- لا يا جمعاوي ما تقولش كدة .. أكيد العيب فية .. المفروض إن بتوع الحزب الحاكم دول أكثر ناس حريصين على مصلحة البلد .. لأن الناس اختارتهم في الانتخابات
- ناس مين اللي انتخبوا مين ؟! انت انتخبت حد منهم؟
- لأ .. بس أكيد ناس كتير اختارتهم .. أمال نجحوا إزاي يعني ؟
- مش بقول لك انت طيب .. دول يا حبيبي نجحوا بحاجة شبه الذكاء الوراثي اللي كنت بتقول لي عليه .. ناقص تقول لي إنك لما تتخرج حتشتغل من غير واسطة
-واسطة !! أعوذ بالله .. انت عارف يا جمعاوي إني مش من الناس دي .. دول قلة مندسة لازم نحاربهم مش نقلدهم
- قلة ؟! .. المهم ياللا بينا عشان نلحق مشوارك بتاع الرخصة دة

أخدت عبده وركبنا المشروع في طريقنا لمكان الاختبار .. وفجأة فرمل السواق ورجع بظهره وكسر في شارع جانبي .. ثم اتخذ طرقا ملتوية .. فقلت :
- إيه يا عم فيلم الأكشن اللي إحنا فيه دة ؟!
- السواق : معلش يا بيه .. أصل الضابط واقف
- أنا : ماشي يا أسطى .. ربنا معاك
- صاح عبده : أنا مش فاهم .. إيه يعني الضابط واقف .. هو انت معاك مخدرات ولا حاجة ؟
- السواق : إيه يا باشا .. انت مش من هنا ولا إيه .. بقول لك ضابط المرور واقف
- عبده : المفروض إن الضابط جي ينظم المرور مش يكعبلها
- السواق : المفروض .. روح قله بأة
- عبده : لأ .. انت أكيد ورقك ناقص .. أو مخالف
- السواق : إيه يا جدعان .. حد يقول له حاجة .. الضابط يا باشا بيطلعك كدة كدة غلطان
- عبده : وهو حيستفيد إيه يعني ؟ .. وبعدين إيشمعنى العربية اللي جنبك مشت على طول
- السواق : انت ما شفتش نمرتها .. دي 3 أرقام بس .. يعني لا مؤاخذة بتاعة حد من الناس المهمين
- عبده : أيوة .. هما دول الناس اللي بيمشوا صح .. عشان المخالفين زيك يتعلموا منهم .. لأنهم أكتر ناس بيحترموا القانون
- السواق : يا بيه انت شكلك راجل طيب

فضلت أحاول أهدّي الكلام بين عبده والسواق لغاية ما وصلنا لمكان الاختبار .. دخل عبده يخلص الأوراق وبعدين وقف مستني دوره في الاختبار ..
ثم اقترب منه رجل سمين وسلم عليه :
- إزيك يا أستاذ عبده .. أنا عم فتحي
- الحمد لله .. حضرتك تعرفني ؟
- أنا يا بيه اللي حركب جنبك وانت بتمتحن
- آه .. أهلا وسهلا
ثم اقترب منه فتحي وقال بنظرة خبيثة :
- كل سنة وانت طيب يا بيه
- وانت طيب
- بقول لك كل سنة وانت طيب .. وكلك نظر يعني
- ما قلتلك وانت طيب
ثم التفت إلي وسألني :
- هو فيه عيد النهاردة يا جمعاوي
قاطعه فتحي : أنا حجيبلك من الآخر .. أنا عايز أشرب شاي
عبده بتلقائية : طيب اتفضل حضرتك .. أنا مستنيك
تدخلت قائلا : يا عبده الراجل عايز قهوته
عبده : شاي إيه وقهوة إيه ؟! انتم شايفني أوبن بوفيه ؟!
أنا : الراجل قصده إنك تشبرقه عشان ينجحك في الامتحان يعني
عبده بغضب شديد : إيه اللي انت بتقوله دة يا جمعاوي .. رشوة يعني ؟!
بص يا عم فتحي انت .. أنا راجل شريف .. إوعى تفكرني من المفسدين دول .. وعلى فكرة أنا بعرف أسوق كويس جدا .. ومش محتاج حد ينجحني
فتحي : خلاص يا عم .. انت حتسيحلي ولا إيه .. أشوفك في الامتحان يا أبو الفتاكة .. سلام

طبعا كلكم متوقعين اللي حصل في الامتحان .. نجح عبده بدقة مذهلة في إصابة كل الطراطير اللي ع الأرض .. وعمل حرف X بدل حرف الـ S .. أما بالنسبة للّفة الكاملة (360) فقد قام ببراعة بأداء أكتر من 20 لفة متتالية
نزل عم فتحي من العربية وهو بيبص بشماتة وخبث .. ثم نزل عبده وهو بيطوح زي السكرانين .. بصراحة ما قدرتش أمسك نفسي من الضحك وأنا بقول له :
- حمد الله ع السلامة يا بطل
لكن اللي نرفزني وجنني رده المستفز :
- تصدق يا جمعاوي أول مرة أكتشف إني ما بعرفش أسوق
قلت بغيظ :
- لأ !! .. إوعى تقول لي إنك ما فهمتش اللي حصل
أجاب ببراءة :
- اللي حصل إني فشلت .. ما كانش لازم أتقدم للاختبار إلا لما أتأكد إني بعرف أسوق

سبت عبده وروحت وأنا عمال أضحك من مواقفه الساذجة .. وأستغرب هو إزاي عايش في البلد دي

لكن بصراحة بعد ما قعدت مع نفسي .. وفكرت في كلامه وردود فعله ما بقيتش عارف .. هل هو طيب ومش فاهم ومضحوك عليه ؟

ولا إحنا اللي طيبين

ومضحوك علينا ؟؟؟

********************

ملحوظة : اللي مفهمش حاجة من القصة يبقى طيب .. وأحسن له يدور على محمية طبيعية قبل ما ينقرض.
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
روان
مشرفة عالم حواء
مشرفة عالم حواء
avatar

انثى
عدد الرسائل : 3614
العمر : 31
المزاج : الحب فى الله
عارضة الطاقة :
50 / 10050 / 100

تاريخ التسجيل : 11/04/2009

مُساهمةموضوع: رد: بلاوي جمعاوي!!!   الجمعة مايو 01, 2009 3:50 pm

يعنى اللى فهم هو اللى مش طيب

طب انا فهمتها كويس

شكرا اخى على القصه

حقيقى فى غايه الروعه

_________________
التوقيع/
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ابن الاسلام
مشرف القسم الاسلامي
مشرف القسم الاسلامي
avatar

ذكر
عدد الرسائل : 2380
العمر : 33
عارضة الطاقة :
50 / 10050 / 100

تاريخ التسجيل : 30/12/2008

مُساهمةموضوع: رد: بلاوي جمعاوي!!!   الجمعة مايو 01, 2009 4:30 pm

اشكرك اختي
واشكرك عالمرور

_________________
________التوقيع________


من اطاااع هواااااااااه
بااااااااااع دينه بدنيااااااااه









الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
الرومانسى
مشرف الحوار والنقاش الجاد
مشرف الحوار والنقاش الجاد
avatar

ذكر
عدد الرسائل : 3427
المزاج : متقلب
عارضة الطاقة :
75 / 10075 / 100

تاريخ التسجيل : 23/11/2008

مُساهمةموضوع: رد: بلاوي جمعاوي!!!   الخميس مايو 07, 2009 7:25 pm

مشكور اخى وتقبل مرورى

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ابن الاسلام
مشرف القسم الاسلامي
مشرف القسم الاسلامي
avatar

ذكر
عدد الرسائل : 2380
العمر : 33
عارضة الطاقة :
50 / 10050 / 100

تاريخ التسجيل : 30/12/2008

مُساهمةموضوع: رد: بلاوي جمعاوي!!!   الأحد مايو 17, 2009 1:49 pm

وانا اشكرك اخي ع المرور الطيب دا

_________________
________التوقيع________


من اطاااع هواااااااااه
بااااااااااع دينه بدنيااااااااه









الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
بلاوي جمعاوي!!!
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات قصر الحب :: الأقسام الأدبية :: القصص و الروايات-
انتقل الى: